S’inície en Salardú eth bastiment d’un punt d’informacion e torisme

Er Ajuntament de Naut Aran, en collaboracion damb eth Conselh Generau d’Aran, impulse es òbres que s’amien a tèrme ena plaça dera Querimònia de Salardú entà bastir un nau punt d’informacion e torisme que pogue atier as visitaires que s’apròpen ad aguest parçan. Eth nau equipament constarà d’un espaci d’atencion, un archiu e un espaci entàs trabalhadors, ath delà d’un banh adaptat. Es tra-balhs, ath delà, an coma objectiu minimizar eth sòn impacte en entorn, per çò que s’a decidit de mantier dus des arbes existenti entà incorporar-les ath nau projècte elaborat peth consistòri. Eth còst dera actuacion ascendís as 199.504,36 euros, ena sua màger part finançadi per hons pròpris der Ajuntament de Naut Aran, a despiet qu’eth Conselh Generau d’Aran apòrte tanben 50.000 euros en vertut deth convèni soscrit entre andúes institucions en 2024, e que tanben auie previst d’auti 8.000 euros entà cambiar d’ubicacion era actuau caseta d’informacion en Arties. Gràcies ad aqueth acòrd, Naut Aran tornaue a formar part de Foment Torisme Val d’Aran, en tot aportar ath Conselh era taxa toristica corresponenta ath dusau e tresau trimèstre de cada an, a diferéncia de çò que hège enquia 2023, quan aportaue era part corresponenta ath totau annau des hons recebudi pera aplicacion deth gravamen.