Projècten bastir ua cubèrta enes pistes de pàdel d’Arties
Era òbra aurà un còst de 110.000 euros
Imatge virtuau de com serà era cubèrta dera pista de pàdel. - AJUNTAMENT DE NAUT ARAN
Es aimants deth pàdel poiràn practicar eth sòn espòrt favorit pendent tot er an en Naut Aran, quan s’age bastit era cubèrta qu’er Ajuntament a projectat entàs pistes de pàdel dera localitat, plaçades ena zòna esportiva d’Arties. Eth consistòri a trèt a licitacion un contracte entara execucion d’aguesta estructura, qu’aurà un còst de 110.000 euros e servirà entà corbir ua superfícia de 257 m2, çò que garantirà qu’era installacion se pogue emplegar tanben jos condiciones climatologiques desfavorables. Era bastissa prepausada aurà ua nautada de 9 mètres, e dada era singularitat dera sua futura ubicacion, damb un especiau interès paisatgistic, se bastirà en tot respectar es materiaus e era volumetria dera zòna, per çò que s’emplegarà husta entàs estructures orizontaus e pilars metallics. Era cubèrta, pera sua part, se formarà damb pannèus de color nere. Era husta, ath delà, permeterà qu’eth procès de montatge sigue mès rapid qu’eth que requerissen d’auti materiaus. Es pistes de pàdel de Naut Aran ja dispòsen d’un sistèma d’enlumenat artificiau, per çò qu’era naua cubèrta comportarà era sua adaptacion. Per aguest motiu, mentre s’execute era òbra serà de besonh era sua desconnexion.
