Alonguen eth hilat de biomassa en Salardú entà cauhar era glèisa

Er Ajuntament de Naut Aran a aprovat er alongament deth hilat de distribucion de calor de biomassa que cauhe e proporcione aigua cauda a diuèrsi edificis, equipaments e espacis pedanhs de Salardú. Damb aguest projècte, qu’a un pressupòst ath torn des 200.000 euros, eth servici arribarà enquiara glèisa de Sant Andrèu e eth camin de Pojo.

Era iniciativa poderie supausar un important estauvi economic, pr’amor qu’era calefaccion deth temple foncione actuauments gràcies a ua sòrta d’aerotèrms electrics qu’an un regim de foncionament d’uns 52 dies ar an e ues 104 ores annaus. Damb era inclusion dera glèisa en nomentat district heating, aguesti dispositius ja non seràn de besonh, e er interior dera bastissa se poirà cauhar de manèra mès eficienta e respectuosa damb eth mèdi ambient, ath madeish viatge que permeterà controlar eth nivèu d’umiditat.

Er actuau hilat de calor tanben cauhe eth sòu de quate carrèrs fòrça arribents de Salardú, as que se higerà ara eth camin de Pojo. Er objectiu ei evitar era formacion de plaques de gèu pendent es mesi d’iuèrn e garantir era seguretat de veïculs e pedanhs ena via publica en aquera epòques.

Eth hilat de calor compde damb ua centrau termica de 1.200 kW de poténcia que foncione damb dues caudères de 400 e 800 kW e provedís d’aigua cauda a trauès d’un hilat de 480 mètres de tuèus isoladi. Eth dessenh iniciau ja aue previst aguesta ampliacion, per aquerò es intervencions previstes damb aguest nau projècte se limitaràn ara connexion deth hilat e ara adaptacion des sales de produccion des diferentes infrastructures o edificis mejançant subestacions de calor. Gràcies ad aguesta planificacion se minimizarà er impacte des òbres e eth còst a repercutir sus eth prètz dera energia.