Un projècte estrelha que pren forma

Construccions basades enes abitatges tradicionau aranesi acuelheràn eth futur centre civic de Salardú, eth projècte mès important der Ajuntament de Naut Aran. Eth projècte aprovat eth passat mes de junh, modificat entà rebaishar es còsti respècte era prepausa iniciau, prepause un edifici entath pabelhon polivalent e un aute entà installacions esportives qu'acuelherà un gimnàs e ua piscina cubèrta. Ad aquerò se higeràn nau abitatges de loguèr qu'eth consistòri a previst d'adjudicar a vesins deth municipi, damb preferéncia entà joeni e persones granes e un parcatge damb dues plantes sosterranhes.Eth projècte aprovat s’a seleccionat entre un dotzenat de prepauses e, segontes eth baile de Naut Aran, César Ruiz-Canela (CA), era decision siguec subjècta a critèris objectivables que deishèren marge ara interpretacion dera taula de contractacion. “Se puntuaue era experiéncia des candidats en projèctes similars”, a dit eth mès naut representant municipau, mentre que d’auti factors èren determinadi prealablaments: era pendent deth terren obligaue a ua construccion escalonada, mentre qu’era densitat d’edificacion e era volumetria des edificis ère limitada pera planificacion urbanistica d’Aran. Aguesta normativa establís damb detalhs aspèctes com eth tipe de tet des edificis, eth tamanh e era collocacion de hièstres e es materiaus e colors que se pòden emplegar enes façades, entre fòrça d’auti.

Distribucion interiora

“Es principaus decisions que poderien préner es redactors deth projècte èren sus era distribucion interiora der espaci”, explique Ruiz-Canela. Era enterpresa adjudicatària, BXD Arquitectura, ac distribuïc “damb er objectiu d’evitar es creuaments de circulacion” entre es usatgèrs des diferenti espacis e “garantir era independéncia foncionau de cadun des usatges”, organizadi en un hilat de tres nuclèus, segontes era memòria deth projècte. Era superfícia bastida, distribuïda en diferentes plantes, e es accèssi ath complèxe somen ua superfícia utila de mès de 7.000 mètres quarrats. Cau rebrembar qu’eth còst des òbres s’estime en 14 milions d’euros, ua chifra considerablaments inferiora as 24 deth projècte iniciau. Eth consistòri argumente qu’aguest nau projècte garantirà ua major eficiéncia e poderà aufrir toti es servicis de besonh.