Ua auta forma d’emberir Vilamòs
Er Ajuntament profite ua accion de repintatge de marques viaus tà aplicar dessenhs que criden era atencion des visitaires. Nau semafòr tà regular eth transit ena carretèra d’Arres

Dus operaris placen un mòtle tà aplicar era pintura. - AJUNTAMENT DE VILAMÒS
Er ajuntament de Vilamòs a iniciat aguesta setmana ua accion de repintatge de marques viaus en diuèrsi carrèrs deth municipi. Ua operacion de manteniment qu'aguest còp includís ua iniciativa revolucionària: pintar diuèrsi passatges de pedanhs deth pòble damb un dessenh que non a arren a veir damb eth tradicionau, format per bandes amples transversaus de color blanc. A compdar d'aguest ostiu, enes carrèrs de Vilamòs se poirà crotzar per passi de pedanhs que reprodusiràn es taques dera pèth d'ua vaca. “Ei ua forma mès de decorar es nòsti carrèrs”, explique eth baile de Vilamòs, Oriol Sala, qu’a afirmat qu'era iniciativa s'ajuste ara normativa. De hèt, autant eth manteniment coma eth dessenh d'aguestes zònes depen dera administracion propietària dera via, segontes confirme ath SEGRE eth Servei Català de Trànsit, per aquerò en tractar-se de carrèrs d'aguest municipi deth terçon de Lairissa, ei eth consistòri qui decidís eth dessenh d'aguestes marques viaus, batiades coma “passatges de vaca”. Era mesura, segontes Sala, vò aufrir ua imatge “mès originau e modèrna” que mòstre era “personalitat” de Vilamòs as visitaires que passen pera localitat.Parallèlaments, tanben s’an repintat es places de parcatge plaçades ena entrada deth municipi e s’an senhalizat es places reservades entà persones damb mobilitat redusida. Tanben s’a installat ua naua senhalizacion verticau e orizontau e s’an plaçat radars pedagogics entà fomentar ua conduccion mès segura.Totes aguestes intervencions, finançades ath 100% pera Generalitat de Catalonha, se completen damb era installacion, prevista entara setmana que ven, d’un semafòr tà regular eth transit entre er inici deth carrèr Major de Vilamòs e era carretèra d’accès tà Arres que, segontes explique Sala, sonque foncionarà en ostiu e “a de servir entà ajudar a evitar collapses quan era Val d’Aran recebe a un màger nombre de toristes.Eth consistòri de Vilamòs ja impulsèc òbres eth passat mes de mai, quan s’amièren a tèrme trabalhs de milhora dera via publica que serviren entà eliminar es desperfèctes e es irregularitats existentes en centre deth nuclèu damb ua naua pavimentacion dera plaça dera Glèisa e era plaça Major d’aguesta emblematica localitat.