Comencen es òbres de reforma dera codina der Espitau Val d’Aran

Aran Salut a començat aguesta setmana es òbres de reforma integrau dera codina der Espitau Val d'Aran, entà modernizar complètament ues installacions que s'adaptaràn as estandards actuaus de qualitat, seguretat alimentària e normativa sanitària.

Eth projècte prevé era renovacion integrau des espacis de trabalh, e era reorganizacion des circuïts de recepcion, magazematge, preparacion e distribucion des aliments. Tanben includís era modernizacion des installacions d’electricitat, climatizacion, sanejament e des sistèmes de supòrt de besonh entà optimizar eth foncionament dera codina, qu’ei un des espacis mès emplegadi per toti es professionaus sanitaris autant coma pacients qu’intègren aguest emplaçament de benèster e salut.

Era intervencion vò milhorar era eficiéncia des procèssi, refortir era seguretat alimentària, adaptar er espaci e aufrir milhors condicions de trabalh ath personau. Aran Salut afirme que se tracte d’ua inversion entà garantir un servici segur, eficient e de qualitat entà pacients, residents e usatgèrs deth centre. Es òbres an un pressupòst de 603.277 euros, finançat ena sua màger part pera Deputacion de Lhèida, e s’alongaràn pendent quate mesi. Mentre duren es trabalhs, s’abilitarà ua codina provisionau mejançant un sistèma de linha heireda entà assegurar era elaboracion deth minjar.

Era directora deth Servici Aranés de Benèster e Salut, Maria Àngels Borràs, a remercat qu’era reforma “ei un besonh estrategic, sanitari e logistic” e que modernizar era codina permeterà plaçar eth benèster deth pacient “en centre dera gestion”.