Ueit pòbles revaliden era distincion de Viles Florides
Bagergue manten era mès nauta en repetir era quatau mencion
Un des carrèrs de Bagergue, plen de flors. - A.N.A.
Era EMD de Bagergue a revalidat es quate Flors d'Aunor des Viles Florides, un reconeishement que torne a plaçar eth pòble aranés entre es 19 damb era categoria mès nauta autrejada enguan, pr'amor que non s'a concedit cap de cincau Flor. D'auti pòbles d'Aran mantien tanben es sòns reconeishements, com Unha, Salardú, Arties, Garòs e Tredòs, damb tres Flors, e Gessa, que manten es dues. Ath delà, era EMD de Vilac a passat de dues a tres Flors. Atau madeish, Salardú tanben a recebut ua mencion especiau pes sues intervencions d’enjardinament, ja que contribuïssen a hèr ua comunitat mès atractiva entath torisme. Eth president dera EMD de Bagergue, Marc Tarrau, afirme qu’era distincion reconeish eth trabalh de tot eth pòble e defen era contribucion de Viles Florides ara projeccion e ara activitat economica locau, laguens d’un modèl respectuós damb eth paisatge e era identitat aranesa. Considère qu’era renovacion deth distintiu consolide un projècte basat en suenh des espacis publics, era jardineria e era qualitat der entorn, especiaument en un nuclèu de nauta montanha. Era iniciativa compde tanben damb era participacion des vesins, que guarnissen es façades, balcons e jardins e d’auti espacis privats damb es que compden. Era gala de Viles Florides que s’a hèt en Reus a distinguit a 177 pòbles catalans.
