Bossòst retire e renauís part der arberatge deth passeg Duc de Dènia

Er Ajuntament de Bossòst retirarà de manèra immediata es arbes afectadi deth passeg Duc de Dènia entà garantizar era seguretat des persones e der espaci public. Era decision s’a prenut dempús d’un estudi tecnic e de diuèrses inspeccions individualizades, qu’an detectat cavitats, pèrta de husta e d’auti defèctes estructuraus en quauqui exemplars d’aguest entorn. Ad aguestes deficiéncies se i higen diuèrsi despreniments de branques aguest an e era proximitat des arbes a zònes de pas de pedanhs e d’estacionament. Coma mesura preventiva, er Ajuntament ja a delimitat aguest airau e restringit eth parcatge.Es trabalhs includiràn es accions de besonh entà retirar er arberatge damb seguretat. Posteriorament, se renovaràn es arbes e se milhoraràn es condicions de plantacion damb irrigacion per esgot, escaucèls protegidi e ua major superfícia de sòu permeable. Tanben se priorizaràn es podades de formacion e manteniment respècte des podades sevères.Era intervencion se coordinarà damb eth nau servici de remassada de residus, que tanben profitarà entà substituïr es dues isles actuaus de contenedors per ua de soleta, que serà integrada en espaci e sense afectar a d’auti arbes que se poguen conservar.