Aigüestòrtes reviu eth centre d’interpretacion d’Arties

Eth Parc Nacionau d’Aigüestòrtes e Estanh de Sant Maurici a recuperat eth projècte entà crear un centre d’interpretacion der aigua en Arties, en Naut Aran. Se tractarie deth prumèr equipament d’aguest espaci protegit ena Val d’Aran. Era Entitat Municipau Descentralizada (EMD) d’Arties e Garòs a cedit dejà es terrens en carrèr dera Mòla, apròp der arriu Garona.

Aguest projècte se plantèc iniciauments en 2009, damb era intencion de daurir es sues pòrtes en 2010 e ua inversion estimada d’1,5 milions d’èuros. Totun, ara se replantejarà eth dessenh entà adaptar-lo a critèris actuaus, en tot priorizar era eficiéncia energetica e ua distribucion mès foncionau des espacis.

Eth centre d’interpretacion der aigua aurà coma objectiu principau facilitar era comprension des foncions der aigua e eth sòn paper fonamentau enes aspèctes ecologics, economics e sociaus deth territòri.

“Volem que sigue ua milhora tà Arties e èm convençudi de que supausarà un benefici autant a nivèu toristic coma economic”, destaquèc era presidenta dera EMD, Lina Fanlo. Ath sòn torn, Lluís Florit, director deth Parc Nacionau, expliquèc qu’aguesta iniciativa forme part d’un plan mès ampli entà refortilhar es entrades deth Parc ena Val d’Aran e era Vall Fosca, en Palhars Jussà, a on er ajuntament dera Torre de Capdella dejà a trèt a concors es òbres entà reformar era istorica Casa Matter damb aguest prètzhèt. Florit senhalèc qu’eth centre ena Vall Fosca aurà coma hiu conductor eth cèu nocturn.

En çò que tanh ath nau centre d’Arties, se centrarà enes sectors deth Parc ubicadi en Aran, especiauments ena Ribèra de Colomèrs e eth sector de Valarties.

Parallèlaments, eth Parc Nacionau seguís en tot trabalhar ena milhora des sòns auti centres plaçadi en Espot, Boí e Llesuí. En concrèt, trabalhe aué dia tà renovar quauqua des sues exposicions vinculades ara restauracion d’abitats aquatics, damb er objectiu de milhorar era experiéncia des visitaires qu’arriben.