Era gent grana d’Aran, amassa contra era soletat
Programa d’Aran Salut que permet as que viuen solets socializar e participar en activitats dirigides. Ena actualitat i a sèt beneficiadi
Ua des activitats guidades per ua professionau a on participen es usatgères. - C.G.A
Cada deluns, dimèrcles e diuendres tà meddia, un grop de sèt hemnes granes dera Val d’Aran se connècten des des sues cases entà participar en talhèrs de codina, exercicis de mobilitat, sessions d’educacion fisica o activitats d’estimulacion cognitiva a trauès de jòcs. Son quauqu’ues des prepauses deth projècte Casau on line, ua iniciativa impulsada per Aran Salut entà fomentar era socializacion des persones granes que viuen soletes o qu’an dificultats tà gésser de casa.
Es sessions se hèn de manèra virtuau e son dirigides per diuèrsi professionaus der airau sociau e sanitari. Ua educadora sociau especializada en gent grana, ua terapèuta ocupacionau, ua psicològa e ua integradora sociau s’encueden de dinamizar es activitats e adaptar-les as preferéncies des participaires.
“Cambiam es tèmes en foncion des interèssi de totes eres”, explique Gemma Martín, coordinadora deth Servici d’Atencion Domiciliària. “Organizam talhèrs de codina, exercici fisic, activitats de mobilitat o prepauses entà estimular era memòria e era atencion”.
Eth projècte ei impulsat peth Conselh Generau d’Aran, a trauès des Servicis Assistenciaus dera Val d’Aran, damb eth prètzhèt de milhorar era qualitat de vida des persones granes que se tròben en ua situacion d’isolament o que, per manca d’autonomia fisica, passen fòrça part deth temps en casa en soletat.
Entà participar sonque cau disposar d’un televisor e connexion a internet. Er Airau des Servicis Sociaus s’encuede d’installar es dispositius de besonh enes cases deth territòri entà facilitar era connexion e garantir qu’es usatgères poguen accedir ath servici sense cap tip de dificultat tecnica.
Segontes era directora deth Servici, Eugènia López, era iniciativa vò mantier actives es relacions sociaus entre es persones granes hènt a servir ua tecnologia simpla e accessibla. “Son persones d’edat auançada e aquerò que se vò ei sajar que poguen mantier relacions. A trauès d’aguest sistèma se pòden connectar damb d’autes persones e participar en activitats guidades per professionaus”, a dit.
Eth programa compde damb sèt participaires, totes hemnes, que compartissen un espaci d’activitat e companhia.
