Pintura e tecnologia en Les damb eth Grafftech

Deth 11 ath 14 de mai, tres espacis emblematics deth municipi de Les acuelheràn muraus de granes dimensions damb tecnologia de realitat aumentada, damb imatges que preneràn vida en guardar-les a trauès dera pantalha d’un mobil o tablet. Les pintaràn en motiu de Grafftech Fest, un hestau internacionau d’art murau. Era localitat acuelherà tres intervencions de gran format, que combinaràn er art urban damb es naues tecnologies, damb era realitat aumentada, era realitat virtuau e era geolocalizacion digitau des òbres. Eth baile, Andreu Cortés, a hijut qu’es tres òbres incorporaràn elements inspiradi ena identitat locau e eth patrimòni pirenenc, “des dera istòria des tèrmes dera Baronia de Les, es hèstes deth huec o era carretèra locau”. Atau madeish, eth consistòri a actualizat era gimcana digitau toristica locau entà qu’es vesins e visitaires poguen conéisher er entorn deth pòble. Eth baile a hijut qu’enes darrèrs sèt ans a compdat damb 15.000 visites. Es usatgèrs auràn de resòlver 12 enigmes en 45 minutes e descorbir diuèrsi espacis dera localitat, e tanben era sua istòria.