Aran Park daurís un observatòri tà veir as lops a trauès d’un miralh

Aran Park, eth centre de visualizacion de fauna de Bossòst plaçat en Portilhon, a pòqui quilomètres dera termièra damb França, a estreat un observatòri ocult que permet as visitaires contemplar as lops de ben apròp, a ua distància de pòc mès d’un mètre. S’obsèrven a trauès d’un hiestrau qu’es bèsties ven com un miralh. Se tracte d’ua installacion com es que se pòden trapar en diferenti centres zoologics de França e qu’aufrís ua experiéncia, enquiath moment, unica en tota Espanha. Es responsables d’Aran Park an incorporat er observatòri de lops ara aufèrta deth centre de fauna aguesta temporada, dempús d’un periòde de pròves en ostiu passat. Eth projècte iniciau prevedie que siguesse ua cramba ena qu’es visitaires podessen passar era net entornejadi des bèsties. Totun, acabèren descartant aquera opcion pes complicacions que supausaue arténher autorizacion entà profitar aguest espaci coma lotjament. En lòc d’aquerò, ei scenari de visites d’ues vint minutes en orari diürn, enes quaus un guida explique es particularitats des lops canadencs que viuen en endret e es des autes varietats d’aguesta espècia. Es visitaires pòden alimentar as bèsties de manèra segura a trauès de tuèus.

Eth centre de fauna daurís aguest guardader as visitaires que paguen un suplement de 5 euros sus eth prètz dera entrada. Hònts d’Aran Park an indicat qu’aguesta experiéncia a recebut enes sòns inicis ua bona acuelhuda deth public. Aguesta installacion se hig a d’autes nauetats que s’an estreat aguesta sason, que comencèc eth passat mes de març, coïncidint damb eth periòde vacacionau de Setmana Santa, e que s’alongarà enquiath mes d’octobre.

S’aufrís ath public era possibilitat d’exercir de cuedadors

Aran Park aufrís as visitaires era possibilitat d'exercir de cuedadors de quauqu’ues des bèsties, en visites qu'includissen alimentar-les e accedir en espacis deth recinte que generaument son barradi ath public. Se tracte d'ua experiéncia que s’organize damb resèrva per auança. Atau madeish, eth parc de fauna a estreat tanben visites en orari nocturn entà grops organizadi. A tot açò i cau híger era incorporacion de naues bèsties: sies cangurs petiti coneishudi coma oalabis e lèbes dera Patagònia. Mejançant era adopcion d'aguestes e damb ues autes innovacions, eth centre, especializat en fauna autoctòna deth Pirenèu mès damb exemplars dera rèsta dera planeta, vò mantier e renovar er interès des visitaires an darrèr d’an.