Rota per Arties, Garòs, Gessa e Unha tà hèr a conéisher es arraïtzes d’Aran
Un recorrut a pè per camins istorics damb informacion sus era istòria, era cultura e era evolucion economica dera Val. Includida en plan de sostenibilitat toristica deth Conselh
Eth punt de gessuda. S’abilitarà un espaci interpretatiu dera rota en Arties.
Ua rota a pè a trauès des camins que comuniquen es pòbles d’Arties, Garòs, Gessa e Unha, en municipi de Naut Aran, harà a conéisher diuèrsi aspèctes dera istòria e era cultura dera Val d’Aran. Tanben divulgarà era sua evolucion economica, des dera ramaderia e era mineria enquiath desvolopament deth sector servicis arraïtz der esquí, a on eth territòri potencièc en grana mesura eth sòn creishement socioeconomic. Aguest ei er objectiu deth projècte Arraïtzes d’Aran, promoigut peth Conselh Generau d’Aran en marc deth sòn plan de sostenibilitat toristica, que vò diversificar era aufèrta dera Val d’Aran e alongar-la mès enlà der iuèrn e er ostiu, en tot auer coma objectiu era desestacionalizacion deth parçan. Eth projècte se base en profitar camins istorics entà convertir-les en itineraris tematics. Entà hè’c se requerirà en quauqui casi milhores puntuaus entà restaurar-les, damb accions coma rehèr murs de pèira seca, tà configurar recorruts de baisha dificultat, ara man de tot tipe de public. Tanben se harà era installacion ath long deth trajècte de diferenti tipes de panèus informatius, damb tèxtes e imatges que faciliten era comprension sus diuèrsi aspèctes deth patrimòni istoric e culturau dera Val d’Aran. Era inversion de besonh entà amiar-la endauant s’estime en 111.772 euros. “Era rota a coma objectiut reconéisher e revalorizar es elements patrimoniaus, culturaus, istorics e etnografics que definissen eth paisatge de Naut Aran: arquitectura rurau, glèises, patrimòni agrari, ramadèr e forestau e camins de pèira seca”, explique era memòria deth projècte, qu’actuauments ei en estratègia de promocion e divulgacion des valors patrimoniaus locaus.
Es camins includidi en projècte hèn un shinhau mès de dètz quilomètres.
Eth punt de gessuda serà Arties, a on s’abilitarà un espaci d’interpretacion dera rota. Ath long d’era, i aurà supòrts e monolits metallics damb informacion entàs visitaires damb ueit tematiques diferentes jos es títols: Es construccions de pèira seca, Era activitat ramadèra, Eth pireneïsme, Ua cultura que batane damb fòrça, Es granes òbres idroelectriques, Era mineria dera Val d’Aran, Es vies de Comunicacion e Era nhèu: era evolucion dera economia de servicis.
