Vielha demane vetar grani camions ena N-230 enquia que l’aishamplen
Dempús deth requeriment deth Conselh a Madrid tà que milhoren era carretèra per seguretat. UA ditz qu’era via a demorat obsoleta e CA demane priorizar eth caplòc enes òbres
Camion accidentat era setmana passada en tram dera N-230 entre era boca nòrd deth tunèl e Vielha.
Eth baile de Vielha e Mijaran, Juan Antonio Serrano (UA), a afirmat que compartís es reivindicacions qu’eth Conselh Generau d’Aran formulèc eth passat dijaus dauant deth Govèrn centrau entà milhorar era seguretat dera carretèra N-230, mès opine qu’aguesta iniciativa aurie d’anar un pas mès enlà e proïbir eth pas de camions de granes dimensions en tram entre Sopeira e eth caplòc aranés mentre era via non se milhore. Segontes Serrano, aguest trajècte “ei ua arratèra” que “non se trape en condicions entà camions tan grani”.
D’aguesta manèra, a dit, s’evitarie era nauta sinistralitat de veïculs pesenti que i a auut enes darrèri ans entre era boca nòrd deth tunèl e eth nuclèu urban de Vielha. Detalhe que serie ua mesura provisionau enquia qu’eth ministèri de Transpòrts amplie era carretèra d’aguest darrèr tram, ua òbra sense data prevista e que requerirà aumens dus ans d’elaboracion d’estudis e projèctes.
Eth darrèr accident siguec era setmana passada, quan un camion basculèc sense provocar herits. Era màger part de sinistres damb camions en aguest tram, aumens quate en dus ans, an acabat sense victimes, mès ocasionen preocupacion. “Aguesta carretèra se bastic en ua epòca a on es camions èren fòrça mès petiti qu’es actuaus”, argumente Serrano. Ath delà, Convergéncia Aranesa, era oposicion en Conselh (UA), reclame prioritat en tram de Vielha en planificar es òbres dera N-230. Enquiath moment, es reformes s’an hèt de sud a nòrd. “Non volem demorar enquiath finau”, afirme era sua portavotz, Ròsa Maria Salgueiro.
